El Fueru de Barruecu (IV): El pasu del Siñoríu a Santiagu / Conclusionis

Tras ver cómu pasó Barruecu a manus d'Armengol VII d'Urgel y las carauterísticas del su Fueru, toca acrarar pa acabar con esti tema qué pasó col Siñoríu de Barruecu tras Armengol. Y es que, pesi a lu ispuestu en el decumentu d'entriega de rentas, la su parentena nu aturó acullá d'una década al mandu'l Siñoríu, y asína, pal 30 d'abril de 1195, un decumentu'l rey Afonsu IX de Lión cunfirmaba'l pasu de Barruecu pa la Orden de Santiagu.

Quepi icir, pur otru láu, que la orden santiaguista llegó a Barruecu ensento con Armengol, cuandu lus primerus representantis de la Orden s'istalorin ena localidá tras jacesi c'un terciu luz ingresus de la igresia de Barruecu-Pardu, polos que la Orden de Santiagu entriegó al Conceju un caballu y una cama empeñá.

La de Santiagu era antoncis una Orden cuasi nueva, con pocu más de venti añus d'esistencia, sendu encimentá pal añu 1170, cuandu'l rey Fernandu II de Lión y l'obispu salamanquinu, Pedro Suárez de Deza, mandorin a un grupu de treci caballerus, conocíus comu lus Fratris de Cáceris, la defensa d'aquesa ciudá, percurandu comu ojetivu tamién defender a lus pelegrinus que diban a ver la sepoltura l'apóstol Santiagu en Galicia y guardiar la lindis d'Estremaúra.

Respeutu de cómu se jizu la Orden de Santiagu colos drechus del Siñoríu de Barruecu, hamus d'icir que lus tomorin pur dos caminus. Pola parti la Casa d'Urgel, lus santiaguistas recibiorin los sus drechus siñorialis al tomar l'hábitu santiaguista l'hiju d'Armengol VII, entris que pa jacesi colos drechus de feudu que tinía Pedro Fernández, la Orden hubu de mercalus a la su hija María.

Por manera que'l pasu a la desotra generación d'Armengol VII, de Pedro Fernández y de Fernandu II degeneró que los sus sucesoris autuasin pa que'l Siñoríu de Barruecu pasasi de móu ligítimu a manus de la Orden de Santiagu, rumpiendu colas heredencias q'hubiá d'asperar comu más naturalis de padris a hijus, lu que comu ya si diju, dio en cunfirmar el rey Afonsu IX de Lión pal añu 1195.

D'esti móu, lus santiaguistas diorin en jacesi con tolos drechus rialis, condalis y de feudu de Barruecu, que pasó asína a andar al frenti d'una vicaría de la Orden de Santiagu, por baju la que pasó a quedar demediu l'entornu barruequinu alredor de cuasi seti sigrus.

Respeutu a aquesta Vicaría, encimentá polos santiaguistas al jacesi col mandu ena villa, quepi icir que quedó drentu la'ncomienda de Peñausendi, enas tierras zamoranas de Sayagu, la cual taba por baju'l Prioratu de San Marcus de Lión (u diócesis de Lión de Santiagu), que cogía tolos territorius de la Orden enas tierras de l'antigua Corona Lionesa (d'ahí el su símbolu, cola cruz de Santiagu por cima d'un lión pasanti, que pue vesi ena iglesia de Barruecu).

Finalmenti, tras rindise la diócesis de Lión de Santiagu pal añu 1873 por me la bula papal "Quo gravius", Barruecu perdiú los sus enlacis cola Orden santiaguista, mas, cuasi comu un caprichu'l distinu, si'l Siñoríu de Barruecu naciú pola entriega que jizu'l rey Fernandu II de Lión, cola esapaición de la diócesis santiaguista lionesa lus territorius de la Vicaría de Barruecu pasorin pal obispáu de Ciarrodrigu, que fuá criáu en el sigru XII mesmu por Fernandu II, golviendu asína perdulabri esi nesu col amentáu rey hasta huguañu.

Conclusionis

Anque se li vien en llamar "catalán" pola parti que tien d'heredencia del drechu foral urgelitanu, lu ciertu es q'el Fueru de Barruecu es una mezcra de regras lionesas y catalanas, bebindu tamién del Fueru de Ledesma. Asína, nu pue ulvidasi q'enu tocanti a lus robus y asesinatus el Fueru de Barruecu lleva direutamenti al ledesminu, sendu asína las regras de Ledesma parti de las de Barruecu en parti'l su Fueru.

Mas tamién hay q'almitir que nu que son luz impuestus y otra regras, asína comu dispués la entriega d'heredá jecha pol condi Armengol a un de los sus vasallus, Pedro Fernández, el Fueru de Barruecu ta más cierca la leyis urgelitanas que de lu q'era patiáu en el Reinu de Lión.

Esti jechu, amás, era bien conocíu pol mesmu Armengol, que reconoz iciendu "ad consuetudinem terre mee Urgellensis" que la su manera de jacer las cosas en parti era más propia del Condáu d'Urgel que del Reinu de Lión, lu q'ensento a la mezcra colas regras ledesminas da una peculiaridá rala al Fueru de Barruecu y al decumentu d'entriega d'Armengol a Fernández.

Por tóu lu ispuestu, y pesi a ser un de lus fuerus del territoriu del Reinu de Lión, el de Barruecu nu pue cunsiderasi en rialidá un fueru corrienti. Asína, dendi'l puntu de vista legal, nu paez ni un fueru típicu lionés, ni tampocu un fueru típicu catalán, anque dambas etiquetas li valgan en parti, sendu un casu únicu de mezcra de regras lionesas y catalanas, hiju del reinu en que queaba'l puebru, mas tamién hiju d'aquellas tierras de las que vinía el condi que dio'l Fueru.

Un Fueru que, nu hay q'ulvidar, el pasáu 24 de mayu jizu 840 añus, a cuenta de lu cual quisi jacer esta serie d'artículus centráus en él. Y es que son casi ochu sigrus y mediu d'un de lus decumentus más ralus y a la vez emportantis pal noroesti salamanquinu, y craramenti, crucial pa la historia de Barruecu, un de lus puebrus con más solera histórica de la nuestra zona.